TIRANE-Qeveria shqiptare garantoi sot se do krijojë lehtësira për EULEX dhe Gjykatën e Hagës dhe i ftoi të vijnë në Shqipëri dhe të hetojnë rreth akuzave të deputetit zvicerian Dik Marti, hartuesin e raportit ku Kosova e Shqipëria akuzohen për trafiqe organesh dhe krim të organizuar.

Këtë deklaroi sot kryeministri Sali Berisha në mbledhjen e qeverisë ku e cilësoi Marti Dik, hartuesin e raportit se, “është një avokat i verbër i krimeve serbe dhe Serbisë së Madhe”.
Berisha ngarkoi Ministrin e Drejtësisë shqiptare ti dërgojë Gjykatës së Hagës një letër ku të garantohet se pavarësisht se mandati i kësaj gjykate përmban vetëm Ish-Jugosllavinë. Lejohet hetimi dhe në zonën Shqiptare.
Kurse për Dik Marti, bëri thirrje, “Dik Marti të dorëzojë provat për autoritetet e EULEX, të dorëzojë cdo provë, përndryshe, ai ka bërë një abuzim të rëndë shumë me drejtësinë dhe shqiptarët”.
Më tej, Berisha tha se Gjykata Ndërkombëtare e Hagës duhet të zhvillojë hetime për akuzat, pasi në këtë raport të Martit-vijoi ai-akuzohet kjo gjykatë se ka fshehur krimet.
“Janë lëshuar akuza direkte ndaj Gjykatës Ndërkombëtare për krimet e luftës në ish-Jugosllavi se janë zhdukur prova. I takon kësaj gjykate të kërkojë se cilat prova ka zhdukur gjykata. Asnjë nga vendet e lira nuk ka qenë kurrë i interesuar që të fshihen dhe zhduken provat e krimeve të luftës. Aq më pak, mendoj dhe gjykoj unë, do të ketë qenë e interesuar Gjykata Ndërkombëtare e Hagës. Ndaj dhe duke ftuar gjykatën që të rinis hetimet e kësaj çështje, e ftoj gjithashtu të qartësojë sepse kjo përbën një akuzë ndaj gjykatës”, theksoi Berisha.

Berisha theksoi se në konfliktet në Ballkan, Shqipëria ka qëndruar gjithmonë në krah të paqes dhe ka luajtur rolin e zgjidhjes së konflikteve.
“Natyrisht Shqipëria nuk ka qënë asnjëherë pjesë e politikës, por pjesë e zgjidhjes së konflikteve, Shqipëria ka qënë në krah të paqes dhe në krah të NATO, për të luftuar dikatorin e Jugosllavisë”.

Kryeministri Sali Berisha, deklaroi sot në mbledhjen e qeverisë, se ushtarët e Luftës Çlirimtare të Kosovës duhet të mbrohen nga akuzat e Dik Marti, duke theksuar se këto akuza nuk janë të vërteta.

Duke folur për Dik Martin, kryeministri i Shqipërisë u shpreh se ai ka qenë avokat i verbër i Serbisë së madhe, duke u bërë palë me kriminelët që shpërngulën nga shtëpitë e tyre mbi 1 milion shqiptarë.
“Kam pasur rastin të jem në Këshillin e Evropës, ky zotëri, Marti, ka qenë një avokat i papërmbajtur i krimeve të shëmtuara mbi shqiptarët dhe unë dua të them se teza e tij kryesore në KE ka qenë kjo: Në Kosovë nuk ka ekzekutor dhe viktima, nuk mund të pranohet që serbët të jenë ekzekutor dhe shqiptarët viktima. Ky ka qenë lajtmotivi i tij për të mbrojtur krimet e luftës. Se kush i përzuri mbi 1 milion shqiptarë se kush mbushi Kosovën me varre masive dhe Savën dhe Danubin me kufoma shqiptarët, për Dik Martin kjo nuk kishte rëndësi. Ai në të gjitha rastet do të bënte avokatin e Serbisë të Madhe”, the kreu i qeverisë.

(d.b/BalkanWeb)