Në Teatrin Kombëtar të Shkupit, të mërkurën në mbrëmje u përkujtua 10 vjetori i paraqitjes së parë të Ushtrisë Çlirimtare Kombëtare në Maqedoni.

Ky manifestim përkujtimor u organizua nga Shoqata e Veteranëve të Luftës dhe Komuna Çairit ndërsa në të morën pjesë pjesë ish- udhëheqës të Ushtrisë Çlirimtare Kombëtare dhe familjet e dëshmorëve,

Ndërkohë, lideri Ali Ahmeti në fjalën e tij vlerësoi rolin e UÇK-së duke theksuar se fillimi i luftës së shqiptarëve në Maqedoni shënoi kthesë historike.

“Marrëveshja e Ohrit dhe Ushtria Çlirimtare Kombëtare ndryshoi statusin e shtetit të Maqedonisë nga shtet i një etnie në shtet multietnik, ky është suksesi kryesor dhe të tjerat mos të presim ti bëjnë të tjerët. Për avancimin e shqiptarëve këtu, ne vetë duhet t’i bëjmë, sepse tapitë, ne na i kanë lënë gjyshërit dhe stërgjyshërit tanë, nuk ua kanë lënë të tjerëve, ata le ti mbajnë tapitë e veta, ne duhet të punojmë për tapitë tona”, tha Ali Ahmeti, kryetar i BDI-së.

Ahmeti është shprehur edhe për zhvillimet e fundit në Maqedoni, sidomos për incidentin në Kalanë e Shkupit duke vlerësuar se marrëdhëniet ndëretnike nuk janë lëkundur.

“Nuk ka nevojë për të vdekur të rinj që të zgjidhen çështje, kur mundemi me politike e dialog t’i zgjidhim ato”, deklaroi Ahmeti në dhjetëvjetorin e paraqitjes së UCK-së.

Lideri i BDI-së ka sqaruar se menjëherë pas incidentit të së dielës në Kala ka kontaktuar me partnerin e koalicionit më të cilin ka rënë që situata të qetësohet dhe problemet të zgjidhen me mirëkuptim. (INA)